Kua hoki atu tō tātou kuia mōrehu a Mere Gilmore ki tōna ūkaipō

Nō te rā tuatahi o te tau hou 2021, nā te iwi me te whānau pani tonu, tō tātou kuia mōrehu a Mere Gilmore i whakahoki ki tōna wāhi nehu ki te urupā o Pekanīkau i te riu o Moerangi. He mareikura hoki a Mere nō ngā kāwai rangatira o Ngāti Hikairo. 

I whānau mai tēnei kuia mōrehu i tōna papakāinga i Ōpārau, he kōtiro nā Honerau rāua ko Lucy Tai-hauāuru. Nō tōna pakeketanga ka moe rāua ko tana tāne ko Stanley Gilmore.  He kuia mōrehu, he hungawai, he whaea hoki a Mere ki a Hinga rāua ko tana tāne ko Lloyd, ki a Mary rāua ko James, ki a Colleen rātou ko Stanely me Te Ana, oti rā ki a Tirohanga Kāwhia rāua ko tana tāne ko Steve. Arā atu anō ngā rārangi mokopuna tuatahi, tuarua hoki a tēnei tūpuna whaea, kua tū tahanga i tōna huringa atu ki tua o te ārai.  Oti rā, kei muri nei tōna iwi e tangi atu ana ki a ia. 

Nō reira e te whaea e Mere,

E tangi haere ana te korowhiti

I tō moana o Kāwhia e!

He tohu nō te mate

I tōu wehenga atu ki te pō

Atu i Kāwhia kai, i Kāwhia tangata

I te okiokinga o tō waka nei o Tainui

Kua huri kē te ihu o tōu waka ki Paerau

Ki tō tāua iwi

E tiraha mai rā

I te wahangūtanga o te tangata!

E te whakaruruhau o te marae

E hoki i te ara takitini,

E te mareikura o te iwi

E hoki i te ara takimano

E te reo karanga o te iwi

E hoki atu rā e kui i te ara ka rere kore ki muri

Takahia atu rā

Ngā tapuwae o rātou mā kua mene ki te pō

Te ringa whakarite o Ngā Taiwhakarongorua

Kua tukua te tangi apakura ki ngā Ariki o te pō

Ki ngā whaitua o tuawhakarere

Hei aramoana atu ki te whāriki takapau o Hinenuitepō

Kua whakahokia koe ki te kōpu o te whenua

Ki tōu ūkaipō!

Ngā wai tukukiri o ngā tūpuna mātua

Ko te awa o Ōpārau e!

Ki te urupā o Pekanīkau i te riu o Moerangi,

I raro tonu i tōu maunga o Pīrongia o Te Aroaro o Kahu.

Ka tangihia tonutia koe i te ao i te pō

E moe, e okioki!

Taku huia raukura e!