He aituaa, kua hinga a Mita Te Hae

“...E huri too kanohi ki te taangaengae

Ko Pekanikau taangaengae

Ngaa okiokinga aa oo tuupuna

A nunui maa

A roroa maa...”

He aitua!

Kua nguu te waha o too maatou paapaa karanga maha a Mita Te Hae i teenei ata.  He tamaiti ia naa Miki Te Hae raaua ko Ruru Te Hae araa Pikia, otiia noo te whaanau Poorima, Toataua anoo hoki.  Kei Oo-Tautahi te koroheke nei e tiiraha ana, aa, ka noho ka nehua ai ki reira i te taha o toona whaiaaipo.

E tangi hotuhotu ana a Ngaati Hineue, a Ngaati Puhiawe otiia a Ngaati Hikairo ki Kaawhia whaanui tonu i tona ngaromanga.

Hoi, i runga anoo i ngaa tukanga o te koowheori ka whaia rawatia teenaa kaupapa e toona whaanau ake.

Noo reira, e te pikikootuku, e te kaakaa wahanui, e rere!  Kua kapohia koe te kupenga o Taramainuku, ka taairi hei whetuu kamokamo i te rangi.  Haere e moe paimaarire!

naa Lloyd Hinga Whiu

10:54 am

22 August, 2021

He tangi apakura nā Jacqui Chesley

nō Te Whānau a Ruataupare

Kei te mihi aroha tēnei ki a koutou e taku whanau nō taua pito o te ao a Kāwhia.  Ko tēnei koroua e noho roa rawa ana ki Ōtautahi.  He kaimanaaki Māori ia ki te hohipera I tētahi wā ka noho tūroro au ki reira.  Nei ra āku mihi arohanui ki tana whānau whānui tonu, ki tana iwi nui tonu.

E te Pāpā, e pari ana koe ki tawhiti nui, ki tawhiti roa, ki tawhiti pāmamao.  E pari ana koe ki te awa o te āke āke, ki te haupūranga o te kauheke kaumātua, he atua, he tipua! E pari ana koe ki Hawaiiki nui ki te hūnanga mai o te tangata hokinga kore ki muri.  Haere atu rā koe!

Nā tēnei mokopuna o Te Whanau a Ruataupare e noho tangi hotuhotu ana mō tēnei koroua ki Waitaha/Õtautahi 😭💔